Psa 114 | XSI | STEP | Muŋgani, lâ zo ŋinde kinzi Isrel ŋgu sipile Isip tâno, lâ zo ŋinde Yakopu ne vâsa ŋgu sipile tinikoa ŋgu nenzi lawea,

Psalms 114

Wâŋgiŋa ŋana zo ŋinde Maro Kindeni iyautenzi Isrel ŋgu piti lâ Isip tâno

1 Muŋgani, lâ zo ŋinde kinzi Isrel ŋgu sipile Isip tâno, lâ zo ŋinde Yakopu ne vâsa ŋgu sipile tinikoa ŋgu nenzi lawea,

2 ande lâ zoni ndaina kinzi Juda ŋgu sipâŋga Maro Kindeni ne ŋgu sapâŋa. Mao nâ, kinzi Isrel ŋgu sipâŋga i tamwata ne tamâta. 3 Maro Kindeni ina ipâŋga Tâi Ŋiŋi pwali, aku tâi nde ikâwa ilâ imandi pa pinde, ilâ imandi pa pinde. Ŋineŋga i ilâ lee ipâŋga Jodan Lââ pwali, aku lââ imandi nâ. 4 Kinzi tuu ŋalaŋala siruru kala sipapatiki sitogonzi meme mine. Aku kinzi tuu kiri-kiri kala sisoŋga pwapwataki sitogonzi lama natu mine.

5 Noko tâi ndai, ande vetâŋa ndia ipâŋga pano kala noko pwâwa mine, a? Aŋga noko Jodan Lââ, mana mana ŋga kurere tia, a? 6 Aŋga miki tuu ŋalaŋala, ande vetâŋa ndia ipâŋga pami kala kapapatiki katogonzi meme mine, a? Aŋga miki tuu kiri-kiri, mana mana ŋga kasoŋga pwapwataki katogonzi lama natu mine, a?

7 Mao nâ, miki kamege ŋana Maro Kindeni kâ kala kaveta mine. Noko tâno ŋai, kala ŋine Maro Ŋalae imâ ipâŋga laiti lâ. Mine kala kuririŋo ŋga! Yakopu ne Maro Kindeni nde imâ ipâŋga lâ; mine nde ara ŋana noko ma kumo kuririŋo nâ. 8 Ŋana tu ina iveta lââ ipâŋga mira ilo ku iyâti imâ, aku inani iveta lââ isâko mira kaika ŋalaŋala ilo ku irere ndue.